Awtor dźensa

Clemens Šmit

Lubi čitarjo, wěsće wy, što maja serbscy koparjo Fabian Korjeńk, Bosćij Bjeńš a Pětr Domaška z Tonijom Kroosom, Sergiom Ramosom a Karimom Benzemu zhromadne? Ně? Nó, to wam rady přeradźu! Wšitcy šesćo mějachu nimo indiwiduelnych sezonowych cilow lětsa cyle wosebity són: Zakitowanje pokala! Tym jednym, mjenujcy „kralowskim“ z Madrida je so wosebity coup minjenu sobotu poradźił. Real přesadźi so w finalu w mišterstwje europskich klubow přećiwo Juventus Turinej jasnje z 4:1. Z tym poradźi so jim to, štož žane europske mustwo dotal docpěło njeje: zakitowanje pokala champions league. Runje tak njeje mi znate, zo je so hdy někajkemu mustwu z našeje wokoliny poradźiło, sej dwójce za sobu wokrjesny pokal zdobyć. Koparjo z Ralbic, potajkim tež Korjeńk, Bjeńš a Domaška móža z triumfom dopokazać, zo je tež tole móžno.