Kóždolětny wolejbulowy swjedźeń sportoweho towarstwa VfB Zhorjelc ze separatnymi wubědźowanjemi za wólnočasne mustwa, žony a muži ma krute městno w terminowej protyce wolejbulowych entuziastow. Lětsa wotmě so wón 20. raz. Bohužel bě to tež po­sledni raz, dokelž VfB Zhorjelc k 30. junijej 2018 rozpušća. Njehladajo na to nastupi 15 mustwow muži. Mjez nimi bě, kaž hižo wjele lět, cyłk Viktorije Worklecy, kotryž chcyše lońše třeće městno zakitować. Zra­njenja a priwatnych přičin dla někotři akte­rojo pobrachowachu. Tak dyrbjachu sej Wor­kle­čenjo z wolejbulistami druhich teamow wupomhać. Zwjeselace bě, zo poradźi so „Hrajnemu zjednoćenstwu Worklecy a přećeljo“ w předkole kwalifikacija za finale najlěpšich pjeć mustwow. Škoda, zo fa­lowaše po wuspěšnych hrach pře­ćiwo „Teddyjam“ z Lipska jenož jedna dobyta­ sadźba k druhemu městnu. Dalše třeće městno w Zhorjelcu pak bě za Worklečanow znowa wulki wuspěch.

Za Viktoriju Worklecy hrajachu: Marko Brězan, Clemens a Ludwig Eckert, Marcel Rjelka a Stephan Wjeńka.