Hdyž započnje so pjatk w šwedskim Östersundźe swětowy biatlonowy cup, njebudźe mjez starterami wjac Ondřej Moravec. 36lětny profijowy sportowc je minjenu njedźelu po swětowym cupje w Nowym Měsće na Moravě swoju wuspěšnu karjeru zakónčił.
Biatlonowa karjera Ondřeja Moraveca bě so 1999 pola SKP Jabloneca započała. Prěnje wulke wuspěchi měješe w Ustíju nad Orlicí rodźeny na juniorskich swětowych mišterstwach w italskim Ridnaunje lěta 2002. Wot 2005 přisłušeše wot Vlastimila Vávryja a Ondřeja Rybářa trenowany atlet čěskej biatlonowej wubrance. Swój prěni start w swětowym cupje pak měješe hižo w lěće 2003. Wjerški Moravecoweje karjery běchu wobdźělenja na olympiskich hrach 2006 w Turinje (Italska), 2010 we Vancouverje (Kanada), 2014 w Sočiju (Ruska) a 2018 w Pyeongchangu (Južna Koreja). W Ruskej doby Ondřej Moravec slěbornu medalju w sprinće, na to bronzu w masowym starće a naposledk slěbro w měšanej stafli z Veroniku Vítkovej, Gabrielu Soukalovej a Jaroslavom Soukupom.
