Dwanaće dobyćow, dwójce njerozsudne a dwanaće poražkow – prěnje koparske mustwo Sportoweho towarstwa 1922 Radwor je w minjenej hrajnej dobje 2024/2025 po 26 hrach wurunanu bilancu docpěło. Jenož wrotowy poměr 44:50 wrotow chileše so do negatiwneho směra, štož móhło tež na tym zaležeć, zo bě so wrotar David Matik w zymskej přestawce zaso do Pančic-Kukowa k Sportowemu towarstwu Marijina hwězda nawróćił.