Worklečanscy wjesni koparjo wostanu turněrej fanoweho kluba ,,Ći swěrni“, kiž Biskopičanske KT 08 tradicionalnje spočatk kóždeho lěta wuhotuje, tež lětsa swěrni. Spočatk februara namaka dohromady wosom wólnočasnych koparskich mustwow puć do sportownje při Dietricha Bonhoefferowej dróze w Biskopicach. W skupinskej fazy, kotraž bu hižo do turněra wulosowana, nastupichu Worklečenjo na spočatku přećiwo mustwu z mjenom ,,Klopdampf BIW“. Hru dobychu 2:0.

Po tym zo bě Luca Šewc nawjedowanje 1:0 docpěł, sćěhowachu dalše wrota Handrija Jakubaša. Kulowčan Jakubaš bě prěni raz za Worklečanow zasadźeny. W napjatej partiji přećiwo mustwu „DRK-komando“ z Ohorna postara so Šewc ze swojimi wrotami wo druhe dobyće dnja.

W poslednim skupinskim zetkanju so něšto sta, štož žadyn fan kopańcy dožiwić nochce: Nimale dwě mjeńšinje do wothwizdanja, při stawje 5:0 za mustwo ,,Hłowna wěc puls“, so přećiwniski wrotar při dwuboju tak njezbožownje zrani, zo jemu pozdźišo w chorowni złamanu nohu diagnosticěrowachu.