W Italskej wojowachu hač do wčerawšeje njedźele wo bronzowe, slěborne a złote medalje. Zymske olympiske hry srjedź Europy w italskich Alpach zahorichu přiwisnikow před telewizorami a šmóratkami, wosebje pak tež fanow, kiž sćěhowachu wubědźowanja na městnje. Jedne z hłownych městnow olympiskich hrow bě nimo wulkoměsta Mailand tež Antholz w Južnym Tirolu. W tamnišim biatlonowym stadionje, kotryž leži něhdźe 1 600 m nad mórskej hładźinu, přewjedźechu so wšitke biatlonowe wurisanja. Antholcowy doł wupřestrěwa so přez něhdźe 20 kilometrow a leži w bliskosći znateho sněhakowarskeho areala Dolomiti Superski. Wubědźowanje najlěpšich biatletkow swěta na čarje 15 kilometrow sym w prěnim olympiskim tydźenju ­žiwje na městnje w Antholzu dožiwił. Mějachu tam jónkrótnu atmosferu, prawu zymsku krajinu kaž tež fairne a napjate boje wo kóždu sekundu. Tak hodźi so olympiske dožiwjenje skrótka zjimać. Tež nastupajo organizacije bě pytnyć, zo maja w Antholzu nazhonjenja z wulkimi sportowymi zarjadowanjemi.