Spočatk nalěća steješe we wolejbulowej wokrjesnej klasy sewjer posledni hrajny dźeń na programje. Worklečanscy Viktorianojo běchu sej hižo na předposlednim hrajnym dnju prěnje městno zawěsćili, tuž njebě prašenje za mištrom hižo tak napjate. Wjeselo steješe na prěnim městnje, bjez toho zo by so bój wo zaměstnjenje dospołnje zanjechał. Mužojo ST Viktorije běchu sej łatu wysoko połožili: Chcychu sezonu bjez poražki zakónčić.

Za Worklecy zasadźeni: Ludwig Eckert, Daniel Gall, Stefan Gedik, Marija Grundajec, Vincent Kuring, Marko Njek, Marcel Rjelka a Syman Žur; poradźowar: Mato Eckert

ST Viktoria Worklecy III –

Módro-běli Wojerecy V 2:0

(25:15, 25:15)

Přećiwnik w prěnjej hrě dnja njeměł Worklečanam při tym na puću stać. Pjate mustwo Módro-běłych bě w hrajnej dobje­ dotal hakle jednu sadźbu dobyło. Hosćo z Worklec nawjedowachu spěšnje 7:0. Hrajerka a wšitcy hrajerjo Viktorije dóstachu swój hrajny čas a přinošowachu k jasnemu dobyću sadźby z 25:15.