Tydźenja bu w Ralbicach nowa pěstowarnja oficialnje wotewrjena. 155 městnow tam za dźěći wot jednoho do šěsć lět maja. Dołho su kubłanišćo twarili a so na nje wjeselili. Zo pak bychu Delenjo z luteho wjesela nad modernym nowym domom wjac dorosta měli – tomu wočiwidnje tak njeje. W gmejnje Ralbicy-Róžant je so loni dwanaće dźěći narodźiło. So wě, zo kubłanišćo tež dźěći z druhich gmejnow wopytuja. A tola rěči ličba za sebje.

W cyłym zarjadniskim zwjazku „Při Klóšterskej wodźe“ bě ličba nowonarodźenych 2024 niska. Jeničce 44 dźěći so w gmejnach Worklecy, Njebjelčicy, Ralbicy-Róžant, Chrósćicy a Pančicy-Kukow loni narodźi. To wuchadźa z wot zwjazka ­wozjewjeneje statistiki, kotraž wobsahuje ličby započejo wot lěta 2001. Wot toho časa njebě nihdy mjenje nowonarodźenych. To ma wuskutki, najprjedy na žłobiki a pěstowarnje, pozdźišo na šule. 44 dźěći, to stej dwě rjadowni.