Zhromadnje z wotrjadom pjasćowanje MSV Budyšina 04 chce załožba něhdyšeho profipjasćowarja Henryja Maski potrěbne dźěći a młodostnych z Budyšina do prózdninskich lěhwow přinjesć. Tójšto předewzaćelow je 12 500 eurow dariło, zmóžnjejo tak 50 kmótřistwow za klětuše lětnje prózdniny.
Henry Maske podpěruje ze swojej załožbu dźěći a młodostnych w Němskej, kiž su chudźi abo maja druhe njelěpšiny. W swójskim prózdninskim campje „PerspektivFabrik“ nad jězorom Beetz w Braniborskej poskića załožba tydźenske prózdninske lěhwa za dźěći a młodostnych, kotrychž starši sej swójbny dowol dowolić njemóža. To potrjechi w Němskej dwaj milionaj dźěći. „Chcemy jich sebjedowěru skrućić, so aktiwnje přećiwo wuzamknjenju zasadźeć a hrajersce teamowy duch a fairplay spěchować“, měni Henry Maske k swojemu angažementej.