Poprawom wšak mějachu so olympiske hry kaž tež paralympiske hry w japanskim Tokiju hižo loni wotměć. To pak koronapandemije dla móžno njebě. Lětsa je so to poradźiło, tež hdyž bjez přihladowarjow. Jurij Nuk z Budyšina je někotre zajimawe sportowe podawki w stawiznach olympiskich hrow zestajał. (1. dźěl)
1896 Athen: Na česć běharja Pheidippidesa, kiž je w lěće 490 do Chrystusa z Marathona do Athena běžał, zo by tam powěsć wo dobyću nad Persičanami posrědkował, přewjedźechu tež marathonowy běh. Dobyćer prěnjeho wotměteho marathona 1896 běše 24lětny grjekski pastyr po třoch hodźinach Spyridon Louis. Wón běše tak prěni narodny rjek modernych olympiskich hrow.
1900 Paris: Prěni króć wubědźowachu so tež atletki.
1904 St. Louis: Tu spožčichu prěnje złote, slěborne a bronzowe medalje.
1908 London: Prěni króć wotmě so wodowe skakanje. Prěni tragiski rjek bě marathonowy běhar Dorando Pietri, kotremuž su krótko před cilom sudnicy jako dospołnje chabłacemu přez cilowu liniju pomhali. „Njedowoleneje pomocy“ dla pak bu italski marathonowc jako dobyćer diskwalifikowany.
