SJ Njebjelčicy –

ST Wulka Dubrawa 0:2 (0:0)

Zestawa domjacych: Hahn – Hanusa, Hermann, Čornak (69. Reinecke M.), Domš F. (64. Landgraf), Šuster, Reinelt, Pawlik, Matješk, Wagner (50. Malaškin), Domš O.

Po štyrjoch hrach bjez poražki su Njebjelčenjo minjenu srjedu w nachwatanskej hrě přećiwo Wulkej Dubrawje podleželi. Hosćo běchu jasnje lěpše mustwo. Woni přeco zaso přez centrum derje kombinowachu a so strašni před wrotami jewjachu.

W prěnim połčasu wrotar Nico Hahn swoje wrota hišće čiste dźeržeše, tež hdyž sej hosćo přeco zaso šansy nadźěłachu. Ze swójskich rjadow bě jenož mało ofensiwnych akcijow. Najlěpšu šansu nawjedowanja měješe Nico Šuster, kiž swoju spěšnosć wuži, ale na přećiwniskim škitarju zwrěšći. Druhi pospyt wujasni Wulkodubrawski zakitowar hišće snadnje před wrotowej liniju. Přiwšěm dźěše z 0:0 do kabiny.