Po nadpadźe Ruskeje na Ukrainu běchu so wšě móžne ruske teamy, atleća a atletki z wulkich sportowych wubědźowanjow wuzamknyli. Mjeztym pak na přikład w tenisu zaso ruscy sportowcy za swój kraj startuja. Před něšto dnjemi je tež paralympiski komitej IPC rozsudźił, zo smědźa so sportowcy a sportowče z Ruskeje klětu na paralympiskich hrach w Parisu wobdźělić, ale pod neutralnym statusom. ­Za prezidenta Němskeho sportoweho zwjazka zbrašenych je to njepředstajomny scenarij. Sćelakej Deutschlandfunk bě wón zdźělił, zo je jara přesłapjeny a zo je to za mjezynarodne paralympiske hibanje chětro „čorny dźeń“. Pola olympiskeho komiteja IOC je wuwiće podobne, reakcije pak nawopačne. Prezident IOC Thomas Bach, jako jedyn, kiž nima žane skruple tež za awtokratami a dema­gogami łazyć, zasadźuje so mjenujcy za to, zo móhli klětu w Parisu zaso wšě top-atletki a top-atleća startować, tež z Ruskeje a Běłoruskeje. Runje tak chce UEFA ruske a běłoruske mustwa na polu ­mjezynarodnych dorostowych turněrow w přichodźe zaso ­dowolić.