Wojerecy (AK/SN). Město Wojerecy wotewrěje wutoru po jutrach wosebity labor k temje „změna strukturow“: „Labor čiń sobu!“. „Je to platforma, kotraž informuje wo wědomosći a kotraž přisporja kubłanje a schadźowanje mjez wobydlerjemi. Chcemy tu wo wjacorych projektach slědźenja do přichoda informować“, podšmórny Sebastian Schindler, sobudźěłaćer projektneje skupiny změna strukturow a koordinator labora, wutoru na posedźenju Wojerowskeje měšćanskeje rady.

Město je labor w něhdyšej korčmje „Wódny muž“ na dróze Dietricha Bonhoeffera blisko domu Martina Luthera Kinga zaměstniło. Projektny partner je Drježdźanska Techniska uniwersita, łužiski centrum technologije Lautech tzwr kaž tež Astrocentrum Łužica. W laborje předstaja zamołwići mjez druhim: Smart Mobility Lab w Čornym Chołmcu, kotryž informuje wo swojim wobchadnym projekće SIVAS (wěstota splećeneho a awtomatizowaneho wobchada), astronomiski podzemski labor „Low Seismic“ Astrocentruma Łužica w Konjecach, kaž tež přichodny Centrum za twarjenje a bydlenje we Wojerecach.