70 sportowych družin, 370 sportowych towarstwow přez 49 252 čłonow – to su aktualne ličby towarstwoweho sporta w Budyskim wokrjesu, kaž čitaš w brošurje wokrjesneho spor­toweho zwjazka za lěto 2025. To rěka, zo nimale kóždy šesty wobydler pola nas w towarstwje sportuje. Mjez dźěćimi a młodostnymi je podźěl z wjace hač jednej třećinu hišće jasnje wyši. To poprawom za tym klinči, zo wobsteji dosć wulki zajim za organizowane sportowe po­skitki. Tola k wěrnosći słuša tež druhi trend, kotryž hižo někotre lěta pokro­čuje: Mjeztym zo je ličba čłonow w towarstwach jasnje přiběrała – wupady z časa korony su so wjace hač wurunali –, bywa pak lěto a mjenje towarstwow. Spad je drje hišće poměrnje snadny a nic pře­jara alarmowacy. W nim wotbłyšćuje pak so wěsty zjaw, kajke ćeže su zwjazane z nawjedowanjom a traćom tajkeho towarstwa.