Štóž prawidłownje sportuje, lube čitarki a lubi čitarjo, to znaje: Po běhu, kolesowanju abo płuwanju čuješ so prosće lěpje – nic jenož ćělnje, ale tež dušinje. A dokelž njeje to jenož tajke ­za­čuće, ale wědomostnje podkładźene, móže sportowanje respektiwnje pra­widłowne hibanje tež ludźom z depre­sijemi pomhać. Depresije liča k najča­sćišim psychiskim schorjenjam po cyłym swěće a po­trjechja w Němskej něhdźe kóždu pjatu wosobu w běhu žiwjenja. ­Žony su při tym husćišo potrjechene hač mužojo, ale tež pola młodostnych je ličba scho­rjenych minjene lěta přeco dale ­stupała.