„Serbska generacija Ž – hinaše žiwjenje, hinaša lubosć?“ je hesło prěnjeho zarjadowanja lětušeje Serbskeje debaty, kotrež wotměje so srjedu, 11. měrca, w 19 hodź. w Budyskej dźěłarni „Dźěłań dźeń“. Čłonka Kolektiwa Wakuum Rahel Zelnak budźe jedna z třoch diskutowacych na po­diju. Milan Pawlik je so z njej rozmołwjał.

Čehodla sće zwólniwa, so na Serbskej debaće wobdźělić? Wo kotrych temach chceće rěčeć?

Mam zasadnje za spomóžne, zo so w diskusiji z temami rozestaješ. Na tute wašnje wšak móžeš swoje pozicije a mysle wjetšemu publikumej předstajić. Temje, kotrejž mje tuchwilu zaběratej a wo kotrymajž chcyła rady rěčeć, stej queerna reprezentanca a feministiski aktiwizm w Serbach. Hdyž zhladuju na aktualne politiske wuwiće ze swojimi sylnymi prawicarskimi tendencami, tež mjez serbskimi młodostnymi, mam za ćim wažniše, zo wotewrjenu diskusiju wo diwersiće, wo swobodnym wašnju žiwjenja wjedźemy.

Sće w serbskej aktiwistiskej skupinje, w Kolektiwje Wakuum aktiwna. Za čo so tam zasadźujeće?