„Kopańca z tyzy!“ Lědma jedyn zwjazkowy ligist so tak sylnje kritizuje kaž RB Lipsk. Za jednych je klub jenož wabjenski projekt koncerna Red Bull, za druhich dawno čwak domizny. Tola wupłaći so snano, hdyž na towarstwo RB Lipsk jónu z hinašeho wida zhladuješ?

Sobotu wječor wjedźeše mje mój puć wróćo do mojeje stareje domizny, do Lipska. Pjeć lět sym tam žiwy był a mnohe RB-hry wopytał. Na hanjace spěwanja přećiwniskich fanow sym so zwučił, te słušachu k tomu. Při jimacym 6:0 (4:0) přećiwo Eintracht Frankfurt wosta pak tónraz w stadionje poměrnje měrne. Tola zasadnje tójšto ludźi mustwo dale wotpokazuje.

Zboka sportoweho podawka mje hižo dlěje druhe prašenje zaběra: Je RB Lipsk woprawdźe jenož njelubowany wabjenski projekt miliardy ćežkeho koncerna?