Po wuchodźenju šule steji młodostnym cyły swět wotewrjeny. Alena Belkotec je so někotrych za jich planami za přichod prašała.
Pawl Deleńk (16), Njebjelčicy: W lěće 2018 chcu abituru złožić. Tak někak hižo wěm, z čim chcu so stać, mjenujcy z twarcom smyčkowych abo cybanskich instrumentow. Dźěłam na tym, swoje přeće zwoprawdźić. Mam tutón plan nětko hižo lěto we hłowje, runje wot toho časa, zo sym w dźewjatce praktikum pola twarca instrumentow wukonjał. Njemóžu sej předstajić, zo so to hišće změni. Kmanosće, kotrež su za tele powołanje trěbne, mi leža, sym hižo někotre nazhonjenja zběrał a sym wćipny na wjace.
Lucija Šołćic (15), Koćina: Chcu šulu z abituru wotzamknyć. Konkretne předstawy hižo mam, bych so rady z fyzioterapeutku stała. To wěm hižo dołho a njemyslu sej, zo so moje přeće hišće wulce změni. Přeco zaso pytnu, zo so powołanje ke mni hodźi. Rady chcu ludźom pomhać, chcu so sama ćělnje napinać a njecham cyły čas jenož w běrowje sydać.