W Budyskim wokrjesu nimale samozrozumliwosć
Budyšin (CK/SN). Nimale połojcu nawodnych pozicijow Budyskeho wokrjesa zaběraja žony. To je jara derje, wšako mamy w cyłoněmskim přerězku jeno štwórćinu tajkich městnow zamołwitosće ze žonami wobsadźenu. Wo tym rozprawješe wčera dr. Helga Lukoschat z Europskeje akademije za žony w politice a hospodarstwje (EAF) w Berlinje. Přez tři lěta přewodźeše wona w Budyšinje regionalne zwjazkarstwo „Žony we wodźacych funkcijach“. Pod hesłom „My něšto zahibamy“ wobdźěli so na tym dźewjeć předewzaćow priwatneho a zjawneho hospodarstwa kaž tež zarjadnistwa a zarjadow. Mnohe předewzaća su temje napřećo jara wotewrjene, zwěsći něhdyši Budyski wyši měšćanosta Christian Schramm na wčerawšim kónčnym zarjadowanju w Dźiwadle na hrodźe. Wón tež rjekny, zo maja w Budyšinje ze žonami we wodźacych pozicijach dobre nazhonjenja. „Dobre přikłady pak dyrbja hišće bóle do zjawnosće, přetož přikłady su najlěpši argument“, Schramm wuzběhny. Wón bě iniciator projekta a chyše tak swoju wjelelětnu zamołwitu funkciju wudospołnić.