Ryba njesteji jeno za čas rybowych tydźenjow w srjedźišću

Rakecy (SN/JK). Po chětro wobćežnym lěće za rybarjow, kotrež wobradźichu jim chłódne nalěto, horce lěćo a haty z mało wodu, je přišoł čas, ryby z łužiskich hatow wułojić.

Hižo 14. raz wotměja so łužiske rybowe tydźenje, a to wot přichodneje soboty. Hłowny organizator, Marketingowa towaršnosć Hornja Łužica-Delnja Šleska (MGO), předstaji wčera zhromadnje z łužiskimi rybarjemi w Rakecach lětuši program. Hnydom na spočatku zarjadowanja potwjerdźi wotrjadnik za rybarstwo Sakskeho zarjada za ratarstwo a geologiju dr. Gerd Füllner, zo budźe tónkróć dosć rybow. „Ličimy drje z tym, zo změjemy jich wo pjeć do dźesać procentow mjenje, ale mnóstwo budźe dosahać, wšitkich zastarać a wočakowanja spjelnić“, wón přitomnych změrowaše.