Zakład strukturneje změny we Łužicy ma zmilinjenje brunicy wostać
Berlin/Choćebuz (SN/JK). Energijowe koncerny RWE, Vattenfall a Mibrag budu w přichodnych lětach brunicowe milinarnje z kapacitu 2 700 megawattow krok po kroku hasnyć. Na to dojednachu so kónc tydźenja ze zwjazkowym hospodarskim ministerstwom. Koncerny dóstanu za to hač do 2022 kóždolětnje 230 milionow eurow zarunanja. Zwjazkowy hospodarski minister Sigmar Gabriel (SPD) hódnoćeše dojednanje jako wažny krok, docpěć klimowe zaměry knježerstwa za lěto 2020. Zdobom chce zwjazkowe knježerstwo tomu zadźěwać, zo w potrjechenych regionach k strukturnym łamkam dóńdźe. Gabriel rjekny wo dojednanju, zo je to dźěławym a předewzaćam dobre a znjesliwe rozrisanje. Braniborski hospodarski minister Albrecht Gerber (SPD) rěči w tym zwisku wo „skónčnje wjetšej jasnosći za ludźi we Łužicy“. Hospodarski ekonom němskeho instituta za hospodarstwo (DIW) Christian von Hirschhausen wobhladuje dojednanje jako drohu a njefektiwnu naprawu, dokelž płaća so kapacity, kotrež njeměli normalnje žadyn popłatk dóstać.
