800 dźěłaćerjow přećiwo wottwarej dźěłowych městnow protestowało

Budyšin (SN/BŠe). Dypkownje w dźesaćich je dźensa dopołdnja něhdźe 800 přistajenych Budyskeho zawoda Bombardier namołwu k stawkej dźěłarnistwa IG metal sćěhowało a dźěłać přestało. Kónc februara bě kanadiski koncern Bombardier připowědźił 930 dźěłowych městnow na Budyskim a Zhorjelskim stejnišću šmórnyć. W Budyšinje je 230 a w Zhorjelcu 700 městnow potrjechenych. W Zhorjelcu je dźensa něhdźe 1 500 ludźi dźěło złožiło. W cyłkownje dźewjeć němskich zawodach koncerna Bombardier bě dźěłarnistwo k akciskemu dnjej přećiwo wottwarej dźěłowych městnow namołwjało. A wšitke su namołwu sćěhowali, štož je jónkrótne.