Přihotuja modernu přehladku z wotměnjawymi poskitkami
Wojerecy (SN/BŠe). Po dwulětnej přestawce přewjedu přichodny kónc tydźenje nowonakład Wikow łužiskeje jězoriny. Zamołwići Wojerowskeje Łužiskeje hale chcedźa zhromadnje ze zarjadowanskim předewzaćom Sodeik Multi Service w delnjołužiskej Wórlicy (Hörlitz), kotrež přehladku hłownje organizuje, wiki wožiwić. „Nochcemy něšto noweho wunamakać, štož bě raz wuspěšne“, měni hłowny organizator wikow René Sodeik.
W lěće 2010 wotměchu so wiki prěni raz. Wosebje wěnowachu so wustajerjo tehdy aktiwitam pod hołym njebjom, sportej a temje wellness we łužiskej jězorinje. Dalše lěta sćěhowachu, prjedy hač přewjedźechu wiki lěta 2013 zhromadnje z Festiwalom łužiskeje jězoriny při Parcowskim jězoru. Po wšěm zdaću pak njewobsteješe tam ze stron wopytowarjow přewulki zajim. Wšako tež festiwal tajki wuspěšny njebě, zo jón hižo dalši raz njewotměchu. Tak su tež Wiki łužiskeje jězoriny prawdźepodobnje šmórnyli.