Ratarske projekty w biosferowym rezerwaće Hornjołužiska hola a haty

Jedyn z wusahowacych nadawkow přirodoškita biosferoweho rezerwata Hornjołužiska hola a haty je, zachować typisku krajinu a stworić za to trěbne wuměnjenja přirodneho wuwića. Sobudźěłaćerjo rezerwata přewjeduja a zwoprawdźeja k tomu mjez druhim tež ratarske projekty. Hromadźe z wědomostnikami a fachowcami připóznatych institucijow přirodoškitneho slědźenja a praktiskeho nałožowanja přinošuja woni tak dźeń a bóle k tomu, zachować bytostnu hornjołužisku krajinu.

Ekologiske ratarstwo dale wuwiwać

Ratarska referentka w biosferowym rezerwaće Eva Lehmann je na lońšim nazymskim kolokwiju w Stróžanskim „Domje­ tysac hatow“ někotre z ratarskich projektow rozłožiła. Konkretnje jedna so při nich wo to, zapołožić struktury w ratarskej krajinje, spěchować rozmnoženje pčołkow a dźiwich insektow, dale wuwiwać ekologiske ratarstwo, zachować stare družiny skotu, spěchować škit wohroženych dźiwich zelow kaž tež zdźeržeć stare regionalne družiny žita.