Na wikach přirody stawizny w srjedźišću stali
Stróža (SN/BŠe). Hdźe drje by so tema zańdźenosć lěpje hodźała hač na wikach přirody. Lětsa bě tomu sobotu w Stróži tak. 15. nakład nalětnich wikow wěnowachu hłownje stawiznam, a to nic bjez přičiny. 675 lět Stróže a 650 lět Lemišowa stejachu w srjedźišću wikow. Hižo minjeny štwórtk běchu w Domje tysac hatow jubilejnu wustajeńcu wotewrěli, a ju móžachu sej wopytowarjo wikow wězo wobhladać. Přiwšěm su w bróžni dwora biosferoweho rezerwata hišće historisku rjadownju Stróžanskeho šulskeho muzeja přihotowali. Jeho sobudźěłaćerka Marlis Konjechtec rozłoži, kak běchu wučbu za čas našich dźědow a wowkow wotměwali a kajke mějachu tehdy jednore šulske materialije. Na historiskich šulskich ławkach móžachu so wopytowarjo wuspytać, kak so ze samodźěłanej tintu, na přikład z wišnjow, a pjerom na tołsty a tehdy hišće rědki papjerc pisa. „Zajim bě jara wulki“, so Marlis Konjechtec wjeseleše.