Kupjele wobhospodarjeć je dźeń a dróše

Niža Wjes/Budyšin/Porchow/Kulow (SN/JaW). Byrnjež ma po wěšćenjach meteorologow wjedro přichodne dny dale a ćopliše być, njejsu wjacore hižo wote­wrjene kupjele – mjez nimi lěsna kupjel w Nižej wsy a Budyska Sprjewina kupjel – z dotalnym wopytom spokojom. Dalše hornjołužiske kupanišća startuja ze zapozdźenjom do noweje sezony, dokelž maja tam hišće ruce połnej dźěła.

Kaž zdźěli Serbskim Nowinam zamołwity lěsneje kupjele w Nižej Wsy Roland Mauff, bě kupjel „na Bože spěće jara derje wopytana, špatne wjedro swjatki pak je dobre wuslědki zaso do pincy sćahnyło“. Wón so nadźija, zo deficit tónle kónc tydźenja nachwataja. Wšako připowědźeja wjedrarjo hač do 30 stopnjow celsija. „Zastupne płaćizny so porno lońšemu změnili njejsu. 15 stopnjow ćopła woda wšak móhła so hišće trochu zhrěć“, rjekny Mauff.

W Budyskej Sprjewinej kupjeli su sezonu 1. meje zahajili, informuje nošer, Budyska wobdźělenska a wobhospodarjenska towaršnosć. Nowe je tam štyri metry šěroke a 16 metrow dołhe suwadło.