Ze zapósłancom wo akcijach zwjazkarstwa Ende Gelände diskutowali

Wojerecy (SN/BŠe). Protesty zwjazkarstwa Ende Gelände běchu wčera tema diskusije, kotruž je Wojerowska Lěwica organizowała. Přeprošeny na nju bě zapósłanc Sakskeho krajneho sejma Marco Böhme, kiž bě so jako parlamentariski wobkedźbowar Lěwicy na protestach wobdźělił. Spočatnje rozkładowaše wón něhdźe 45 přitomnym – mjez nimi wobydlerjam z regiona, sobudźěłaćerjam Vattenfalla kaž tež zawodnym radźićelam šwedskeho předewzaća – poćah mjez klimowej změnu a wustorkom wuhlikoweho dioksida. „Wobkedźbujemy změnu z wulkej starosću. Chcemy-li přichodnym generacijam hódny žiwjenski rum zawostajić, dyrbimy nětko jednać“, zapósłanc Lěwicy podšmórny podpěrujo zdobom protesty zwjazkarstwa. Ćišć na knježerstwo wukonjeć a so skónčnje ze strukturnej změnu a kóncom wotbagrowanja brunicy zaběrać bě zaměr protestow. „Zwjazkarstwo njeje k namocy namołwjało, ale k měrnym blokadam, štož je so we wulkej měrje stało“, Marco Böhme wuswětli.