Chcedźa z peticiju znamjo protesta sadźić

Budyšin (SN/BŠe). „Čim wjace ludźi podpisa, ćim lěpje“, měni čłonka předsydstwa Lěwicy Zhorjelskeho wokrjesa a zdo­bom rěčnica krajneho dźěłoweho zjednoćenstwa za wobswět Adele Sabine Kunze, kotraž je peticiju k přepytowanju financnych strukturow čěskeho koncerna Energetický a Průmyslový Holding (EPH) nastorčiła. Peticiju sakskemu financnemu ministrej prof. dr. Georgej Unlandej (CDU) je dotal 4 412 ludźi podpisało. Tež w Braniborskej chcedźa tamnišemu financnej ministrej Christianej Görke (Lěwica) peticiju ze samsnym zaměrom přepodać. A tam je mjeztym 3 236 ludźi podpisało. „Docpějemy-li ličbu 10 000, by tole wulke znamjo było a by dopokazało, zo telko ludźi předań łužiskeje brunicoweje sparty čěskemu koncernej EPH kritisce widźi“, lěwicarka praji. Přiwšěm nječini sej wona wulku nadźiju, zo krajnej knježerstwje peticiji přihłosujetej a žadanja spjelnitej. To je prosće iluzoriske. Přiwšěm je wažne, zo ludnosć swój protest pokazuje.