Błóta mjez turistami wosebje z Němskeje dźeń a woblubowaniše

Wětošow (SN/BŠe). Wjele ludźi je připowědźiło, njewěstoty we wukraju dla, lětsa swój dowol w Němskej přežiwić. Tole pytnu tež w Błótach. Tak ma Błótowski turistiski zwjazk ze sydłom w Radušu mnohe naprašowanja wosebje nastupajo krótki dowol hač do třoch dnjow. Kaž hižo loni su ličby knihowanja jara dobre. Hižo wot januara do februara běchu turistikarjo ze 33,6 procentowskim přerězkom přenocowanjow derje wućeženi. Ličba turistow wosebje w lěću hišće jasnje rozrosće. Štóž chcył potajkim swój dowol w lěću tam přežiwić, měł so do spěcha měć. Wo kapacitach wobhonić móža so zajimcy telefonisce abo přez majlku pola turistiskeho zwjazka w Radušu abo w interneće na stronje www.spreewald.de. Wězo skića turistikarjo w Błótach hosćom indiwiduelne zestajane programy. „Tam je zawěsće za kóždeho něšto zajimaweho pódla“, zdźěli nawodnica Turistiskeho zwjazka Błóta Annette Ernst.