Štóž hdys a hdys do Budyskeje piwarnje přińdźe, kotraž je tež jako kehelownja znata, tón wě, zo móžeš sej tam piwo ze swójskeje produkcije słodźeć dać. Lětsa zhladuje tale piwarnja na 20lětne wobstaće. Jeje piwo dóstawaš mjeztym tež w hosćencach města a wokrjesa kaž tohorunja we wjacorych wobchodach.

Započeli běchu so stawizny piwarnje hižo 1994. Dźensniši mějićel domu Karsten Herrmann je tehdy imobiliju ke­helownje kupił. Zhromadnje ze swojim nanom chcyštaj tradiciju piwowarjenja zaso wožiwić, kotraž bě w sprjewinym měsće po přewróće w „poslednich storkach“. Za to pak trjebaštaj najprjedy raz kmany objekt. 1994 dohladaštaj so kehelownje, kotraž bě na předań. Chětro marodne twarjenje pak wobsahowaše hišće dalši problem: na wšě 350 aktiwnych kehelerjow we wjacorych sportowych towarstwach. Z nimi pak so Herrmann spěšnje dojedna. Kehelerjo přilubichu, zo załoža třěšny zwjazk, z kotrehož pomocu kehelersku čaru wobhospodarjeja. A Karsten Herrmann tehdy přilubi: „My staramy so wo chmjelowu brěčku.“