Budyšin (SN/BŠe). Móžnosćow, dóstać so z busom ze stolicy Hornjeje Łužicy Budyšina do Berlina, budźe wot jutřišeho mjenje. Předewzaće Flixbus je připowědźiło, zo njebudźe wjac wšědnje z Budyšina do němskeje stolicy po puću. „Busy pojědu wot pjatka do póndźele jenož hišće jónu wob dźeń z Budyšina přez mjeńše wsy a Choćebuz dale do Berlina. Wottam móža pućowacy do Dessauwa, Köthena a Bernburga jěć“, zdźěli nowinska rěčnica Flixbusa Marika Vetter na naprašowanje Serbskich Nowin. Dotal bě bus wšědnje zasadźeny, njeje pak přez Choćebuz a tamne naličene města jěł.

„Na jednym boku móžu předewzaće zrozumić, wšako sym so hižo často prašała, kak móže telko zwiskow tak tunjo poskićeć. Na tamnym boku bě to za mnje jara dobra alternatiwa, swojich přiwuznych doma wopytać“, praji Julia Šramic z Radworja, kotraž poskitki Flixbusa rady wužiwa. Busowa jězba na mjenowanej čarje traje něhdźe poł hodźiny dlěje hač z awtom.