Zawod Maja-meble so na wukubłanskich wikach wosebje angažuje

Kulow (SN/BŠe). Z temu wukubłanje wučomnikow so Kulowski zawod Maja-meble intensiwnje zaběra, wšako njemysla tam jenož na tuchwilne połoženje jara derje wukubłanych sobudźěłaćerjow, ale tež na jutřišu a zajutřišu situaciju. „Wjele lět smy z potenciala regiona čerpać móhli“, wuswětla jednaćel zawoda Uwe Gottschlich. Mnozy přistajeni su starši hač 50 lět, tohodla dyrbja na přichod myslić. A při tym ma předewzaće wěstu ćežu. Na meblach, kotrež w Kulowje zhotowjeja, njeje dokładnje spóznajomne, zo wottam pochadźeja. Wšako twarja za znate šwedske předewzaće IKEA, kotrež produkt tež pod tymle mjenom předawa. Kulowski zawod je na to pokazany ze swójskim mjenom wabić.