Na 6. hospodarskim forumje diskutowali

Kamjenc (JK/SN). Sakski statistiski zarjad w Kamjencu nastaja wot lěta 1997 prawidłownje prognozy za wuwiće wobydlerstwa w swobodnym staće. Wčera předstaji prezident zarjada Burkhard Müller na 6. hospodarskim forumje, na kotryž bě zapósłanc CDU w Sakskim krajnym sejmje Alojs Mikławšk přeprosył, wuslědki a tendencu regionalizowaneho předwobličenja wobydlerstwa na konkretnym přikładźe Budyskeho wokrjesa. Wobličenja statistikarjow trend wuwića hač do 2030 wobkrućeja, zo je w Sakskej lěto a mjenje wobydlerjow a zo bywaju tući přisamom dale a starši. Tohorunja wěste je, a wobličenja to podšmórnu, zo koncentruje so wobydlerstwo přiběrajcy we wulkich kopjenišćach wokoło wulkoměstow Drježdźany, Lipsk a Kamjenica.

Trendej woteběraceho wobydlerstwa a zestarjenja móhli wjace porodow a přiběraca ličba zapućowarjow wotpomhać. Byrnjež ličba porodow w Sakskej tučasnje nad němskim přerězkom ležała, njemóže to tomu zadźěwać, zo spadnje ličba wobydlerjow Sakskeje w lěće 2025 pod štyri miliony.