Zły Komorow (AK/SN). Kulinariske měšćanske pućowanje po Złym Komorowje ma přichodnje stawizny a wokřewjenje zwjazać. „Domoródni měli so z městom znowa zeznajomić, turisća pak sej přez gastronomiju stawizny wotkryć. Woni waža sej regionalnu kuchnju a domizniske wudźěłki“, wuzběhny jednaćelka turistiskeho zwjazka Łužiska jězorina Kathrin Winkler w Złym Komorowje, hdźež je turistikarjam a nowinarjam koncept předstajiła. Zhromadnje z městom a partnerami bě wona poskitk wuwiła, kotryž hodźi so cyłe lěto knihować. Pućowanje wobohaća cyłkownje sydom stacijow, kaž kofejownja Kreuztor abo wobchod, hdźež móža sej zajimcy dary z wina abo druhich delikatesow zestajeć.
„Z nowym měšćanskim wodźenjom hodźa so stawizny a stawiznički derje zwjazać. Pućowanje je aktraktiwne wobohaćenje turistam. Tak wabimy za swoje historiske stare město“, hódnoćeše wodźerka po měsće Christine Treuger. Poskićeć chce turistiski zwjazk krótše wodźenje we wobjimje 2,5 hodźin a dlěšu wariantu třoch hodźin.