Budyšin (SN/BŠe). Klimoškitny plan zwjazkoweho knježerstwa wuwabja tuchwilu wulke diskusije. Hakle zašły tydźeń je ministerka za wobswět Barbara Hendricks (SPD) připowědźiła, so njehodźa so klimoškitne zaměry do lěta 2020 docpěć. Tak je zwjazkowe wobswětowe ministerstwo nowy naćisk plana zdźě­łało, kotryž skići nastupajo zmilinjenje brunicy wjele brizancy. Tak w naćisku na přikład rěka, zo měło so mjenje brunicy zmilinić. Tež nowe brunicowe milinarnje a rozšěrjenje wuhlowych jamow su wopačne inwesticije a njeměli so hižo dowoleć. Za potrjechene regiony w Porynskej a Łužicy měli so strukturne łamki wobeńć. Spušćić dalše inwesticije do brunicy je w zmysle politiskeje moderniza­cije.

Runje nětko k zahajenju klimoweje konferency w marokkoskim Marrakeshu naćisk předleži, hdźež chcedźa politikarjo předewšěm nastupajo redukowanje wuhlikoweho dioksida wuradźować. Tež němske milinarnje jón wustorkuja.