Mjezynarodny zeleny tydźeń w Berlinje słuša k najwuznamnišim zarjadowanjam w Němskej. Mjeztym zhladuja tam na 91lětne stawizny a wotměja přehladku wot 20. do 29. januara lětsa hižo 82. raz.
Berlin/Budyšin (SN/BŠe). Madźarska je lětsa partnerski kraj Zeleneho tydźenja w Berlinje. Wjac hač 1 600 wustajerjow z 65 krajow z wobłukow ratarstwo, zežiwidła a zahrodnistwo kaž tež zastupjerjow zarjadow a turistikarjow tam wočakuja. Mjez nimi budu tež zaso zawody a institucije z Hornjeje Łužicy. Tak chce Kubšiski pjekar Stefan Richter wopytowarjam swoje wudźěłki ze starych žitnych družin předstajić a poskićeć. Wosebity wjeršk budźe na dnju ptačeho kwasa 25. januara, hdyž wón hosći tohorunja z najwšelakorišimi družinami pječenych srokow překwapi. Tež wosebity chlěb z mjenom Hornjołužiski kwasny smědźa ludźo tón dźeń woptać.
Tež team Wojerowskeje woleńcy chce so na lětušej přehladce wobdźělić, zo by wopytowarjam wosebite kajkosće łužiskeho laneho wolija zbližił. Předewzaće z nazhonjenjemi pak pokaza w stolicy hišće dalše wolijowe poskitki.
