Kónc decembra je zwjazkowe knježerstwo w Berlinje rozsudźiło, změnu ekosměrnicy Europskeje unije wo lěto wusadźić. Wulke wolóženje to za twarske předewzaća, ale problem wostanje.

Budyšin/Radwor (SN/BŠe). Nowa směrnica Europskeje unije nastupajo twarsku maćiznu HBCD, kotruž nańdźeš w styroporje, rjemjeslnikow hižo wot oktobra chětro wobćežuje. Srědk, kotryž móže spěšnje palacy styropor před płomjenjemi škitać, ma Europska unija nětko za jědojtu. Tuž su ekosměrnicu krótkodobnje změnili, a to z konsekwancami.

We wulkim mnóstwje běchu twarske firmy styropor jako wonkownu izolaciju twarjenjow wužiwali. Su z nim domy prawdźepodobnje zapakowali. Stajnje nowe změny a prawidła ćopłotneho škita sej to prosće žadachu. Mjeztym wšak styropor hižo tak njewužiwaja, ale druhe maćizny, kaž na přikład mineralnu wołmu. Woprawdźe dobre a zapłaćomne alternatiwy twarcy tuchwilu přiwšěm nimaja. Nimo toho njeje styropor trajny, zo maja so chěže po wěstym času ponowić.