Budyšin/Drježdźany (SN/at). Budyska ludowa banka a Drježdźanska ludowa a Raiffeisenowa banka budźetej so zjednoćić. Hižo loni stej wobě tónle krok připowědźiłoj. Přihoty pospochi postupuja. Jasne je, zo wšitke 18 filialow Budyskeje ludoweje banki – tak tež w Hućinje, Bukecach, Wósporku, Kamjencu, Rakecach, Kulowje a Wojerecach – a 16 Drježdźanskeje dale wobsteja. Nastupajo pjenježne awtomaty je Kubšiski wohroženy.

„K wupowědźenjam njedóńdźe“, předstejićel Budyskeje ludoweje banki Klaus Otmar Schneider podšmórny. Ličbu dźěłowych městnow drje wo 40 połnych městnow pomjeńša, to pak stanje so po dobrowólnym puću na přikład přez wotnamakanja, rjadowanja dočasneho wuměnka abo přez zrěčenja wo časowje wobmjezowanym dźěle.

Bance stej hospodarsce jenak sylnej. Budyska ma bilancnu sumu 930 mio. eurow, Drježdźanska 950. mio eurow. „Bilanca něhdźe dweju miliardow je strategiska pozicija do přichoda“, rjekny Klaus Otmar Schneider. Woteńdu-li młodźi ludźo z Budyskeho regiona do Drježdźanskeho jich banka přichodnje njezhubi. Klient steji tež dale w srjedźišću.