IG BAU porokuje „křiwe“ połoženje na dźěłowych wikach wokrjesa Budyšin
Budyšin (SN/at). Ličba njewěstych dźěłowych poměrow w Hornjej Łužicy dale přiběra. W Budyskim wokrjesu nimale 48 860 ludźi dźělnje dźěła, su wupožčeni dźěłaćerjo abo maja minijob. To je jich jenička mzda. Kaž industrijne dźěłarnistwo twar-agrar-wobswět (IG BAU) wuchodneje Sakskeje w nowinskej zdźělence piše, je podźěl tak mjenowaneho atypiskeho dźěła na wšěch dźěłowych poměrach loni w Budyskim wokrjesu na rekordnu hódnotu 40 procentow rozrostł. Dźěłarnistwo zepěra so při tym na aktualne přepytowanje Hansa Böckleroweje załožby, kotraž je wuwiće dźěłowych wikow wot lěta 2003 analyzowała.
