Köln/Berlin (dpa/SN/BŠe). Wobsadźene kolije, ludźo w běłych škitnych woblekach, naddimensionalna čerwjena linija, tójšto policije a stupacy kur z wuhenjow: Měsac do wólbow zwjazkoweho sejma su wobswětowi aktiwisća w Porynskej přećiwo wudobywanju brunicy demonstrowali. Jich poselstwo politikarjam bě: na dobro klimy dla hnydom přestać brunicu wudobywać!
Wobrazy kónc tydźenja wotměteho klimoweho campa w Porynskej hižo z Łužicy znajemy. Loni wokoło swjatkow běchu aktiwisća tež tam masiwnje protestowali, štož zbudźi wulke diskusije, hač bě zdźěla namócny protest woprawnjeny. Tónkróć w Porynskej dóńdźe tohorunja k jednotliwym rozestajenjam z policiju. Někotre razy dyrbješe energijowy koncern RWE wukon produkcije w Neurathskej brunicowej milinarni wobmjezować, dokelž běchu aktiwisća kolije zaraćili.