Ratarjo wo nowej hnojenskej směrnicy raznje diskutowali
Lejno (AK/SN). Nowa hnojenska směrnica Zwjazka k škitej wodźiznow a pitneje wody łužiskich ratarjow chětro poćežuje a wubudźa kritiku. „Směrnica płaći wot lětušeje nazymy, štož je jara krótkodobne. Wšitcy ratarjo maja směrnicu nałožować, tež w tych kónčinach, hdźež nimaja žane problemy z nitratom we wodźiznach.“ Tole podšmórny čestnohamtski předsyda regionalneho burskeho zwjazka Budyšin-Kamjenc Stefan Triebs wčera na informaciskim zarjadowanju ratarjow w Lejnje. Tam zhonichu łužiscy ratarjo wo směrnicy hnojenja, wo hnojenskim prawje a wo wosebitym bilancnym postajenju za maćizny. „Hnojenske prawo a směrnica hižo předležitej. Bilanca je tuchwilu hišće naćisk, ju pak ma Zwjazkowa rada 22. septembra wobzamknyć“, rozłoži nawoda referata za plahowanje rostlin, zaso rosćacych surowiznow a wobnowjomnych energijow w krajnym burskim zwjazku Andreas Jahnel.