Łužiscy ratarjo lěto a žně bilancowali

Lejno (AK/SN). Lětuše wunoški žnjow su přerězne. Na lóšich pódach wostachu ratarjo pod přerězkom. Tole podšmórny čestnohamtski nawoda regionalneho burskeho zwjazka Budyšin-Kamjenc Stefan Triebs na njedawnym informaciskim zarjadowanju w Lejnje. „Nalětnja suchota je slědy zawostajiła. Na někotrych blakach bě so prosće přepozdźe dešćowało“, wón rozłoži, „wjacekróć su wichor a krupy wulke regiony, kaž Kinspork-Łužnicu, domapytali.“ Bohudźak pak njemějachu ratarjo w Hornjej Łužicy telko dešća kaž w Braniborskej.

Přesłapjace běchu lětuše žně rěpika. Toho běchu sej wšitcy ratarjo regiona přezjedni. Dobre wunoški kaž w lětach 2004 a 2007 tak spěšnje hižo njezměja. Přičina toho su na přikład změny rostlinoškitnych srědkow.