Iniciatiwne zwjazkarstwo chce korekturu brunicoweho plana Wochozy II
Rowno (AK/SN). Z wolóženjom, radosću, ale tež z dwělemi je iniciatiwne zwjazkarstwo „Strukturnu změnu nětko – žane Wochozy II“ nowy koncept Łužiskeje energijoweje AG (LEAG) na wědomje brało. „Brunicowy plan za Wochožansku jamu dale wobsteji, njeje žaneje prawniskeje, žaneje politisce jasneje zwjazanosće, zo njebudźe ničo wjace wotbagrowane“, wuzběhnje Adrian Rinnert, rěčnik zwjazkarstwa, w rozmołwje za Serbske Nowiny. Zwjazkarstwo je hižo na zahajenu proceduru Regionalneho planowanskeho zwjazka Hornja Łužica-Delnja Šleska za nowy brunicowy plan reagowało a chce tak pokazać, zo přewozmje zamołwitosć. Štyri jasne žadanja maja nastupajo přichodne wuwiće Slepjanskeje wosady. Dróha Slepo-Miłoraz ma so zachować, minimalny wotstawk jamy k bydlenskim domam, pěstowarni a pohrjebnišću ma 400 metrow być. „Dźe wo škit před haru, prochom a střasenjemi. Wotstawk 100 do 150 metrow ke kromje jamy njeje wobydlerjam přimjeznych wsow přicpěwajomny. Woni trjebaja skutkowny škit“, rěčnik podšmórnje.