Módro-běli Kulow – ST Radwor 1:1 (1:0)
Zestawa hosći: Ch. Šěrak – Bauer, Henke (C), F. Šěrak, Zähr, Pěčak (73. Hosaini), Nuk, Kral, Wjeńka, Rachela (36. Jendrewski), Amar (69. Glücklich)
Po domjacej poražce přećiwo Rakečanam chcychu Radworscy koparjo sobotu w Kulowje wo dypki sobu hrać. Wonkowne wuměnjenja z 32 stopnjemi w chłódku běchu za přihladowarjow optimalne, za hrajerjow bě to ćežki dźěłowy dźeń.
Kulowčenjo jako faworit spytachu hru kontrolować a přećiwnika k zmylkam nuzować. Wosebje dołhe třělwy na agilneho Franka Popjelu běchu dobry recept, z kotrymž móžachu zadnje mustwo hosći znjeměrnić. Runje to wjedźeše w 13. min. tež k wuspěchej. Popjela přesadźi so na lěwym boku a zběhny bul přez Chrystofa Šěraka do wrotow. Tući hač do toho hrajny wotběh docyła njewobwliwowachu, dwuboje přěhrawachu a tež w ofensiwje žadyn strach njewubudźichu. Wonkowna prezenca a mentalita dospołnje pobrachowaštej. Tak woni hižo w prěnim połčasu taktiku přestajichu, zo njeby partija hižo do połčasa rozsudźena była, a zwosta při 1:0.