LSV Hory – Sokoł Ralbicy/Hórki 0:1 (0:1)
Zestawa hosći: Schöne – Matka, Schultz, B. Bjeńš, Hilbich (84. Budar), S. Bjeńš, Šołta, Rawš, Korjeńk, Domaška (74. M. Kurjat), G. Kurjat (90. J. Bjeńš)
Duele přećiwo Horjanskim koparjam tam abo doma běchu koparjam Sokoła Ralbicy/Hórki w minjenym času stajnje napjata naležnosć, tak tež njedźelu dopołdnja při sylnym dešću. Wot spočatka hač do kónca běchu dwuboje horce a hra w žanej sekundźe rozsudźena. Lěpši start na Horach mějachu hosćo z Ralbic. Zady stejachu woni poměrnje wěsće a w ofensiwje łakachu na zmylki. Tajke so w hrajnym natwarje domjacych hdys a hdys stachu, nažel pak Sokoljo je tak derje njewužiwachu. Po dalokim wotkopje jich wrotarja Willija Schöny so nutřkowny škitar z Horow zatrochowa. Pětr Domaška składnosć wuži a z hłójčku wrotarja k 0:1 přelesći (23.). Jenož pjeć mjeńšin pozdźišo wotpopadny znowa Domaška bul swojeho přećiwnika, ale njedósta hrajny nastroj tak prawje pod kontrolu. Hosćićeljo spytachu jeno z dołhimi třělwami k wuspěchej dóńć, sokołskaj škitarjej Bosćij Bjeńš a Andy Schultz pak wšitko z hłowu znješkódništaj.