ST Marijina hwězda
– ST Lubuš 2:0 (1:0)
Zestawa domjacych: O. Schmidt – Wróbl, Škoda, Hawš, Lipič, Ch. Cyž, Kuring (81. Čornak), Pjetaš, P. Schmidt (85. Bejmak), Eldor, Pakoßnick (65. R. Cyž)
Při krasnym nazymskim wjedrje pohosćichu koparjo ST Marijineje hwězdy dotalneho načolnika ST Lubuš. Bě jasnje spóznajomne, zo chcedźa so chowancy trenarja Erwina Kleinmanna po poražce we Wojerecach zaso na dobyćerski puć wróćić. To so jim z wuspěchom 2:0 tež poradźi. Prěnjej móžnosći Jakoba Pakoßnicka (13.) a Alija Eldora (20.) pak wrotar hosći wuběrnje wotwobara. W 33. min. padny po lapsusu zadnjeho mustwa ST Lubuša 1:0. Pakoßnick reagowaše najspěšnišo a přihra bul Chrystofej Cyžej, kiž jón wótrje do wrotow smokny. Po tym skićeše so hosćićelam dwójna šansa na 2:0. Najprjedy zwrěšći Feliks Pjetaš na jara sylnym wrotarju přećiwnika, tež druhi pospyt Pakoßnicka bu wot najlěpšeho Lubušana wotwobarany (33.).