Najprjedy nowe joby, na tym ministerski prezident Kretschmer wobstawa

Berlin/Drježdźany (SN/at). Prěni krok je sči­njeny. Komisija, kotraž ma kónc wudobywanja brunicy přihotować, je so wče­ra w Berlinje na doporučenja za struk­turnu změnu dojednała. Čłonojo komisije „Rozrost, strukturna změna a dźě­ło“ su mjezyrozprawu jednohłósnje schwalili. Dokument pak najprjedy zjawnosći njespřistupnja, kaž powěsćernja dpa pisa. Runje tak njeje tam hišće časowy plan za kónc wudobywanja a zmilinjenja brunicy zapřijaty. Kaž předsydźa gremija, mjez nimi bywšej ministerskaj prezidentaj Sakskeje a Braniborskeje Stanisław Tilich (CDU) a Matthias Platzeck (SPD), wčera wuzběhnychu, je konstruktiwna diskusija pokazała, zo wšitcy čłonojo wuhloweje komisije swoju zamołwitosć porno ludnosći w brunicowych regionach jara chutnje bjeru. Wobzam­knjenje je spomóžny zakład, zo bychu „tež předstejacu klimowu a energijopo­litisku diskusiju wuspěšnje wjedli“. Hač do kónca lěta ma wo tym jasnosć być.