ST Lubuš
– ST Marijina hwězda 0:6 (0:2)
Zestawa hosći: Matik – Wróbl (76. Lipič), Zelnak, Jurš, R. Cyž, Schmidt (65. Melnyk), Pjetaš, Hawš, Ch. Cyž, Eldor (46. Winkler), Pakoßnick
W Lubušu pobrachowaše wulki dźěl stajneho personala koparjow ST Marijineje hwězdy a k tomu tež hišće trenar Erwin Kleinmann. Za to je po dołhej zranjenskej přestawce Matijas Wróbl zaso sobu hrał. A hosćo chcychu na kóždy pad dobyć, štož so jim z kanterowym dobyćom tež poradźi. W prěnich mjeńšinach woni hišće žane prawe móžnosće njemějachu, tež hdyž duel jasnje dominowachu. Z wuběrnej akciju pak wuhra Oskar Hawš štyrjoch hrajerjow a třěli bul z kromy šěsnatki preciznje do šibjeńcy k 0:1 (20.). Hakle po wjacorych dobrych a jara dobrych móžnosćach (23. a 30. Jakob Pakoßnick, 32. Paul Schmidt, 33. Pakoßnick) smokny Schmidt wólny kop ze zdalenosće 21 metrow z centralneje pozicije do wrotow (41.). Krasne to 0:2!