Trjebane kolesa požadane byli

Mittwoch, 18. September 2019
Artikel bewerten
(0 Stimmen)
Trójce wob lěto je w Kamjenskim wobchodźe za kolesa „bursa trjebanych kołow“. Mějićel předawanišća Tilo Scheibe (naprawo) kupcow poradźuje.  Foto: Feliks Haza Trójce wob lěto je w Kamjenskim wobchodźe za kolesa „bursa trjebanych kołow“. Mějićel předawanišća Tilo Scheibe (naprawo) kupcow poradźuje. Foto: Feliks Haza

Kamjenc (SN/mwe). Wot lěta 1991 maja w Kamjencu, w něhdyšej keramikowej fabrice wobchod, hdźež kolesa předawaja. Mějićel bikehousa je Tilo Scheibe. Pod hesłom „swoboda, přiroda, spěšnosć, rozpalitosć – wšo druhe činimy my!“ so jědnaće přistajenych wo kupcow stara. To njejsu jenož ći, kotřiž koła předawaja, ale tež přistajeni, kotřiž je reparuja. Sortiment je přewšo šěroki, wot minikolesa hač k elektrokolesej a tohorunja trekkingowe koła w Lessingowym měsće dóstanješ. Wotpowědnje rozdźělne su tež płaćizny. Za dobre koleso ludźo dźensa rady wjace pjenjez wudaja.

„Su-li spočatk 90tych lět wosebje młodostni před wobchodom stali a sej tehdy najnowše marki z wćipnoty wobhladali, da sej ludźo dźensa cyle wědomje nowe koło kupja“, Scheibe wiki wopisuje. Zaměrnje je wobrot stupał. „Dźěćom a młodostnym je koło často jenička móžnosć, mobilnje wot jednoho k druhemu městnu přińć. Wjace pak tež nic. Tuž njemóžu rjec, zo je zajim ludźi za kolesowanje a z tym zwjazany sport w minjenych lětach nahle přiběrał. Nawopak. Wšitcy dyrbimy so přeco zaso předrěč a přewinyć, na koleso zalězć a so pohibować“, fachowc zwěsća. Derje je, tak wón dale, zo zawody elektrokolesa kupuja a swojim přistajenym samo darmotnje za wužiwanje přewostajeja.

Dokelž w Kamjenskim Scheibec bikehousu rumnostnych wobmjezowanjow dla wšědnje trjebane kolesa njeposkićuja, přewjedu tam trójce wob lěto „bursu trjebanych kołow“. Tak kaž njedawno, móža ludźo swoje trjebane koleso do wobchoda přiwjezć. Tam je wone wěsty čas wustajene a na předań. Na postajenym a sčasom wozjewjenym terminje wobchodnicy trjebane kolesa za wučinjenu płaćiznu dale předaja. „Nawal bě zašły króć tak wulki, zo dyrbjachu ludźo čakać a sej rady naš cyłkowny sortiment wobhladachu“, tak Tilo Scheibe z nadźiju, zo tež w přichodźe puć do wobchoda namakaja.

Veröffentlicht in Hospodarstwo
Bitte anmelden, um einen Kommentar zu posten

Anzeige