Wokrjes Budyšin hišće zastarany

Freitag, 20. Dezember 2019
Artikel bewerten
(0 Stimmen)

Medicinske zastaranje wobydlerjow Budyskeho wokrjesa je tuchwilu zaručene, kaž sakske zjednoćenstwo kasowych lěkarjow wobkrući. To pak nje­wuzamkuje, zo su tu abo tam ćeže falowacych fachowych medicinarjow dla.

Budyšin (SN/BŠe). Demografiske wuwiće a wotchad ludźi z wjesnych kónčin wjedźetej k problemam. Cyle konkretnje su to ćeže, zo dale a wjac młodych lěkarjow, hladarjow abo chorobnych sotrow radšo we wjetšich městach dźěła hač na wsy, zdźěli sakske zjednoćenstwo kasowych lěkarjow na naprašowanje SN. Tajkemu trendej pak hodźi so zadźěwać. Toho­dla su politika, gmejny, wšelake gremije a chorobne kasy namołwjene hromadźe dźěłać a rozrisanje nańć.

Sakske zjednoćenstwo kasowych lěkarjow dźěła zaměrnje na tym, něšto změnić, a zasadźa we wosebje potrjechenych kónčinach Sakskeje spěchowanske srědki. Prěnje płody móžachu hižo žnjeć. Tak su we Łutach, Kamjencu, Wojerecach, Bukecach a Rakecach k tomu přinošo­wali, zo su so nowi domjacy lěkarjo w regionje zasydlili. Přiwšěm hrozy tež dale strach, zo njebudu ludźo medicinsce dosć zastarani.

Krajny wuběrk lěkarjow w chorobnych kasow w prawidłownych wotstawkach pruwuje, hač je medicinske zastaranje ludnosće dosahace. Zakład toho su wob­liče­nja, kotrež so po potrjebje měrja. Přichodne tajke přepruwowanje je klětu kónc januara předwidźane. W tym zwisku budźe gremij pruwować, hač su w oktobrje wupokazane swobodne lěkarske městna mjeztym wobsadźene.

Sakske zjednoćenstwo kasowych medici­narjow lěkarjow wobstajnje na to skedźbnja a jim radźi, hižo wobstejace praksy přewzać. To ma wšelake přičiny. Jónu je to hižo zadźěłany a kwalifiko­wany personal. Dale hodźa so hižo wobstejace rumnosće wužiwać. To najwaž­niše pak je zawěsćić pacientam pomoc na městnje.

Hladajo na lisćinu wupisanjow, hdźež lěkarjo za naslědnikom pytaja, je jich tele dny 80 inseratow, wosom z nich za Bu­dyski wokrjes. Hač su to powšitkowny lěkar­, chirurg, žónski lěkar, kóžny lěkar, psychoterapeut – w mnohich padach chcyli zaměstnjeni lěkarjo swoju praksu w blišim času wotedać. Tuž maja młodźi medicinarjo z wotpowědnym wotzam­knjenjom najlěpše wuměnjenja, na wjesnych kónčinach so zasydlić.

Veröffentlicht in Hospodarstwo
Bitte anmelden, um einen Kommentar zu posten

Anzeige